Тыйым салынғанына қарамастан, Қазақстанда вейптер мен электронды сигареттердің заңсыз саудасы тоқтамай тұр. ҚР Қаржылық мониторинг агенттігі ел аумағында заңсыз өнімді әкелу және сатумен айналысатын ірі желілерді әшкерелеп, ауқымды тексеріс нәтижелерін жариялады.
Соңғы мәліметтерге сәйкес, жыл басынан бері заңсыз сауданың 25 дерегі батыл тоқтатылып, құны орасан зор 276 мыңнан астам электронды тұтыну жүйесі тәркіленген. Қазіргі уақытта осы салаға қатысты 37 қылмыстық іс бойынша тергеу жүріп жатса, 14 іс толығымен аяқталып, сотқа жолданды.
Сондай-ақ елордамыз Астанада вейптердің заңсыз айналымын ауқымды түрде ұйымдастырған қылмыстық топтың үстінен де іс қозғалды. Тексеріс барысында бұл топтың өнімдерді арнайы қоймаларда сақтап, негізгі сауданы интернет-дүкендер мен мессенджерлер арқылы жүргізгені белгілі болды. Қылмыскерлер қолданған банк шоттары арқылы айналымға түскен ақша көлемі 3,2 миллиард теңгеден асып түскен.
Бұдан бөлек, Қарағанды және Ұлытау облыстарында да осы заңсыз сауданы дөңгелеткен азаматтарға қатысты тиісті сот үкімдері шықты. Тек Қарағанды облысының өзінде жалпы құны 340 миллион теңгені құрайтын 30 мыңға жуық вейп тәркіленіп, заңсыз бизнестің жолы кесілді.
