Қызылорданың келбетін қалыптастырған мүсінші

Қала көшелеріндегі монументтерге күн сайын көзіміз түседі. Алайда олардың авторлары туралы біле бермейміз. Қызылорданың көркін келтіріп, Сыр өңірінің тарихын өнер арқылы танытып жүрген тұлғалардың бірі – мүсінші Жәркен Исмағұлов. Ол – Қазақстан Суретшілер одағының мүшесі, Қазақстанның мәдениет қайраткері.

Мүсіншінің қолтаңбасы өңірдегі бірқатар танымал ескерткіштен көрінеді. Соның ішінде Қорқыт ата монументі, «Сыр ана» мен «Сыр сұлуы» композициялары ерекше орын алады. Бұл туындылар қаланың сәулеттік келбетін толықтырып қана қоймай, Сырдың тарихы мен рухани болмысын да бейнелейді.

Қорқыт ата монументалды кешені — шебердің танымал жұмыстарының бірі. Биіктігі 12 метр болатын ескерткіш Қорқыт ата кітабының 1300 жылдығына орай тұрғызылған. Қобыз бен желмаяға мінген Қорқыт ата бейнесі қазақ халқының рухани мұрасын айшықтайды.

Ал Сырдария ауданындағы Тереңөзек кентінде орналасқан «Сыр сұлуы» монументі 2012 жылдың соңында ашылған. Биіктігі 16 метр болатын композициядағы қолын екі жаққа жайған әйел бейнесі Сыр бойының дарқандығы мен дарияның қасиетін бейнелейді.

Жәркен Исмағұлов Алматыдағы Н.В. Гоголь атындағы көркемсурет училищесінде білім алып, кәсіби өнер жолына түсті. Оның шығармашылығы Қызылордамен шектелмейді. Астана қаласында да Қызылорда облысының тартуы ретінде ұсынылған «Қорқыт-қобыз» композициясы бар.

Мүсін – жай ғана тасқа қашалған бейне емес, ол тарих пен уақыттың көрінісі. Жәркен Исмағұловтың туындылары Сыр өңірінің мәдени мұрасын ұлықтап, туған жердің келбетін қалыптастыруға үлес қосып келеді. Қала өзгергенімен, халық жадында қалған өнер туындыларының мәні жоғалмайды.