Қазақстанда қыз-келіншектерге арналған «Ұмай» жеңілдетілген ипотекалық бағдарламасына қызығушылық күрт артты. Осыған байланысты «Отбасы банк» қаржыландырушы серіктесі — Азия даму банкіне (АДБ) қаражаттың екінші траншын жоспарланған уақыттан бұрын бөлу туралы өтініш жолдады. Бұл жайында Орталық коммуникациялар қызметінде өткен брифинг барысында банк басқарма төрағасының орынбасары Жансұлтан Матай хабарлады.
Бірінші кезең қалай өтті?
- 31 тамызда басталған алғашқы кезеңге бөлінген 9 млрд теңге көлеміндегі қаржы бірден игеріліп, барлығы 855 өтінім тіркелді.
- Түскен барлық 855 өтінішке алдын ала мақұлдау берілді. Қазіргі уақытта қатысушылар баспана таңдап, қарызды толық рәсімдеу сатысында жүр.
- Қатысушылар сұраған қарыздың орташа мөлшері 23,4 млн теңгені құрады.
- Жобаға қатысқан ең жас үміткер — 18 жаста, ең егдесі — 63 жаста, ал орташа жас шамасы — 39 жас.
Бағдарлама қалай жалғасады?
«Ұмай» бағдарламасының жалпы бекітілген бюджеті — 90 млрд теңге. Қазақстандық әйелдердің белсенділігіне байланысты банк келесі траншты ертерек іске қосуды көздеп отыр. Жаңа өтінімдер қабылдаудың нақты мерзімі Азия даму банкімен келісілгеннен кейін қосымша жарияланады.
Банк өкілінің сөзінше, қатысушыларға қойылатын негізгі талаптар мен шарттар өзгеріссіз қалады.
